दिलीप वळसे-पाटील आंबेगाव-शिरूरमधून लढणार अपक्ष?

शिरूर (तेजस फडके): आंबेगाव-शिरूर मतदार संघामधून दिलीप वळसे-पाटील हे अपक्ष म्हणून निवडणूक लढणार असल्याची चर्चा मतदार संघात सुरू झाली आहे. दिलीप वळसे-पाटील यांनी शरद पवार यांचा हात सोडून अजित पवार गटात गेले आहेत. मतदारांमध्ये याबाबत नाराजी असून, दिलीप वळसे पाटील हे अजित पवार गटाकडून निवडणूक न लढता अपक्ष म्हणून लढण्याची शक्यता आहे, अशी माहिती खात्रीशिर सुत्रांनी दिली.

माजी खासदार शिवाजीराव आढळराव पाटील यांनी शिवसेना सोडून अजित पवार गटात प्रवेश केला होता. मतदारांना हे खटकले होते. यामुळे आढळराव पाटील यांना पराभवाला सामोरे जावे लागले. शिवाजीराव आढळराव पाटील यांनी अपक्ष निवडणूक लढवली असती तरी निवडूण आले असते, असा सूर नागरिकांमध्ये त्यावेळी होता. आढळराव पाटील यांच्या पराभवानंतर वळसे पाटील यांच्यावर सुद्धा मतदारांची मोठ्या प्रमाणात नाराजी आहे.

शिवाजीराव आढळराव-पाटील यांचा पराभव डोळ्यासमोर असताना दिलीप वळसे-पाटील हे धोका पत्करण्यास तयार नाहीत. अजित पवार गटाकडून न लढता अपक्ष म्हणून लढले तर फायदा होईल, यामुळे ते आंबेगाव-शिरूरमधून अपक्ष म्हणून लढण्याच्या तयारीत आहेत, अशी माहिती सूत्रांनी दिली.

दिलीप वळसे-पाटील यांनी एका कार्यक्रमात बोलताना मोठा गौप्यस्फोट केला. ते म्हणाले की, ‘काही लोकं विचारतात की तुम्ही पवार साहेबांना का सोडलं, पवार साहेबांना सोडायचा प्रश्नच येत नाही. बऱ्याच लोकांना बऱ्याच आतल्या गोष्टी माहीत नसतात. पक्षाच्या 54 आमदारांची बैठक बोलावली आणि त्यात सरकारमध्ये जाण्याची चर्चा झाली. आपण सरकारमध्ये जायचं ठरलं, दुसऱ्या पक्षात नाही. आपण कोणत्या पक्षात गेलो नाही, आपला पक्ष राष्ट्रवादी व चिन्ह घड्याळच आहे. अजित पवार गटात गेल्यामुळे लगेच आपण शरद पवार साहेबांचे शत्रू झालो, आणि ते आपले शत्रू झाले असे नाही. त्यांच्या बाबत प्रेम व आदर आजही आपल्यात आहे. पण विरोधकांकडे मुद्दे नाहीत, काही भांडवल नाही, बोलायला मुद्दे नाहीत म्हणून हे भावनिक मुद्दे मांडले जातात.’

दरम्यान, आंबेगाव-शिरूर मतदार संघामधून देवदत्त निकम हे प्रबळ उमेदवार समजले जात आहेत. त्यांनी निवडणूकीची जोरदार तयारी सुरू केली असून, नागरिकांना त्यांचा मोठा प्रतिसाद मिळत आहे.